Allir kennarar vilja bæta námsárangur nemenda sinna og leita fjölbreyttra leiða til þess. Í pistlunum hér á undan var sagt frá skólum í Englandi sem hafa náð langt í því að bæta námsárangur. Þeir skólar eiga það sameiginlegt að hafa skapað námsmenningu í anda leiðsagnarnáms . Hér á eftir eru fjórir grundvallarþættir sem einkenna námsmenningu leiðsagnarnáms reifaðir. Fyrir þá sem vilja fræðast meira má benda á þessa síðu:
Nemendur þurfa að vita til hvers er ætlast af þeim
Til að nemendur viti til hvers er ætlast af þeim þurfa námsmarkmið í hverri kennslustund og/eða með hverju verkefni vera skýr. Þessi daglegu eða vikulegu námsmarkmið eru leiðarljósin þegar nemendum eru gefnar leiðbeiningar. Tryggja verður að nemendur skilji hvað þeim er ætlað að læra áður en þeim er ætlað að bera ábyrgð á eigin námi. Í mörgum tilvikum hafa nemendur rangar hugmyndir um hvað þeir eru að læra, hvers vegna þeir eiga að læra það og hvernig gott nám fer fram. Það er mjög mikilvægt að skýra námsmarkmiðin fyrir nemendum og að þeir séu virkir þátttakendur í þeirri umræðu.
Kennarar þurfa að draga fram hvað nemendur hafa lært í kennslustund áður en lengra er haldið
Það er mikilvægt að kennarar átti sig á því hvaða nám á sér stað hjá nemendum á hverri mínútu í hverri kennslustund. Því er hægt að ná fram með samræðum í kennslustofunni og námsmarkmiðum sem hægt er að nýta til að meta hvort kennslustundin hafi verið árangursrík. Að spyrja markvissra spurninga, bíða eftir því að nemendur svari, passa upp á að allir nemendur geti/þurfi að svara eru allt leiðir sem nýttar eru til að meta hvort nemendur hafa náð því sem fram fór áður en haldið er lengra og ný námsmarkmið sett fram.
Endurgjöf
Endurgjöf kennara til nemenda í lærdómsferlinu – ekki í formi umsagna eða einkunna – er mikilvægur þáttur í starfi kennara, en ekki alltaf auðveldur. Endurgjöfin þarf að koma á réttu augnabliki, einblína á það sem nemandinn á að læra, geta nýst nemandanum á því augnabliki sem hún er gefin svo hann læri af henni. Það eru til margar aðferðir við að gefa endurgjöf, samræður og að merkja við í verkefni nemenda eru dæmi um tækni við endurgjöf. Hér má finna umfjöllun um endurgjöf.
Að virkja nemendur
Með því að virkja nemendur svo þeir geti verið gerendur í eigin námi og námi samnemenda sinna eykst námsárangur. Stýring nemenda og meðvitund um eigið nám t.d. með sjálfsmati eflir nemendur og þeir eiga auðveldara með að trúa á eigin getu til náms, þeirra innri bjargir eflast, þeir upplifa aukið vald á aðstæðum og öðlast tilfinningu fyrir sjálfræði. Þessir þættir hjálpa nemendum ekki aðeins að taka ábyrgð á eigin námi heldur geta leitt til aukins námsárangurs.
Bendi á veggspjald frá MMS sem Menntamálastofun hefur gefið út um það hvað einkennir góðan námsmann.
Þetta er aðeins lítið brot af því sem mikilvægt er að hafa í huga þegar skapa á námsmenningu í anda leiðsagnarnáms, sem skipta allir miklu máli. 
EK
Krítin 